Ad altare Dei
mal-orgni tal-għodwa.
Bħal pagoda mixgħula

Kultant
nismagħni naħseb
bħal brimba li toħlom
għanqbuta tal-ħġieġ

Matutin
nintona
meta noħroġ fis-sried tal-għodwa.

Kemm kien ikun sewwa
Mulej
kieku kellna
tinda nwaqqfu hawn fuq
fuq din l-għolja
għalik u għalina!

Marbut ħalluni
mal-arblu majjistru …
ħalluni marbut b’dawn il-ħbula.

Fil-pontifikal tal-bosk
lil hinn mill-jien
tiela’ l-inċens tal-memorji…

Il-ħbabat barokki tal-bronż
jaħbtu mal-bieb
u jwerwru l-uħux.

Taħt il-kannizzati tiegħek
li jqattru eliżir
bl-inbejjed ta’ mħabbtek
nixxaħxaħ Mulej…

Nixpakka bl-uġigħ
biex ħaj inreġġgħek
mill-ġdid quddiemi
ja ħija!