Riħa ta’ mastka mixruba fin-ngħas
fiha l-mewt…
riħa ta’ nokkli sewdiena ta’ żingara …

Bħal imsaħħar
l-orgni tal-għodwa ssammajt jitliegħeb
wara l-ħġejjeġ tas-sħab ġewwa l-lvant.

Ibaqbaq
bħal kaldarun imħares mill-allat
imjassra ġol-munġbell.

Bħall-bżieq aħdar ħaxix ta’ bebbuxu
bellusi jfuħ ir-riq ta’ fommu.
Bil-pjagi stigmati msammra
ma riġlejh u dirgħajh fl-imħabba.

Kif boxxla bejn żewġ djamanti mwieżna
fl-arja titgħawwem,
iżomm fid-dlam tal-ġuf fosforexxenti
il-bniedem ħuta.

Bħal qawwa
fgata f’ċilindru dejjaq
marsus kien l-univers fi traba ċkejkna.

Ġenninni l-bosk …
għanjietu daħlet fija
kif tidħol qalb iz-zkuk fewġa sajfija.

O Spanja, Spanja kemm jinżilli mieles
f’qalbi dak ismek ħlejju.
Navarra, Katalonja u Aragona,
Kastilja, Andalusija.

Fuq Patmos tlajt imnebbaħ
fuq il-qċaċet ta’l-għana fejn l-iriwefen
bħal weraq tal-ħarifa bid-dawran ħafnuni.