Int li tissogra
b’għajnejk fissi tħares imżarġna
f’għajnejn ix-xemx…

Donnejtni sponża
inlaqqat
mill-mehrież tal-univers
sigriet l-ispazju

Biż-żejt il-lewż
ta’ bewsti nidilkek
u nbaħbħek
bi dmugħ l-għasir tal-ġunġlien.

Ja Anubis
alla falz
bid-daħqa ta’ xakall,
la tħarisx lejja

Kif Alla
qabel fassal l-Univers
indaga bl-għajnejn
ġewwiena

Bħaż-żibeg tal-ħġieġ,
bħad-dmugħ tal-granit,
bħall-għaraq taż-żnied
qed iqattar…

Meta nirkeb għarwien
fuq ġild il-bhejjem tal-ifrat
b’riqi jċarcar ma’ xlieqi…

Mulej tkattarlix dawl għajnejja.
La ddommlix ġismi kollu
għajnejn bħal fosos qarnita…

Qatt ma jidher isbaħ Ħaġar Qim
daqs meta tittertaq
qalb il-weraq tal-ħarrub
ix-xemx fi nżulha…