Kif Alla
qabel fassal l-Univers
indaga bl-għajnejn
ġewwiena
t-tifsila
tal-baħħ etern
hekk tagħmel il-brimba żebbieġa
li tkejjel b’rotella misterjuża
l-irkejjen
sal-ibgħad itruf.
U bħal perit tqejjes l-ispazju
bid-diwi inviżibbli
ta’ ġjometrija.
L-għanqbuta tifforma bis-sarsi
raġġiera biċ-ċentru perfett
gravitali.
Ebda angolu mhu anqas minn ieħor.
Poligoni ssarraġ jitriegħdu fil-baħħ.
Tħoss l-ambjent
il-brimba
ġo rokna ta’ kamra
jew bejn żewġt izkuk
u minnu ssawwar opra tal-arti:
mansab benniena.
Il-brimba ssarraf u tiżen
bħal Alla
qabel fassal l-univers
u wara l-ħidma
mas-seba’ jum straħ.
U bħal skerz
fuq l-għanqbuta tal-ħolqien
qatra nida xegħel
Alla
bħala xemx tirtogħod
u tilma
dinjiet
bil-miljuni.